Musikalisches Sommerfest im Altenzentrum St. Marien (Juli 2023)

„Loss mer zesamme singe“

Mer woren, noh zwei Johr operzwungener Enthaldung
bei  schönstem Wedder, am Friedag däm 7.7.2023 ab 15 Uhr
em große Gaade zom Singfess zesamme gekumme.

„Endlich es ens widder jet loss “  „Och, wat es dat schööön“  
„God dat mer widder zesamme fiere künne.“
Dat sin nur drei Zitate vun dä ussgesprochene Freud, die mer hatte.

De musikalische Begleitung log en denne fließige Häng vum Peter Lange.
Hä hät unser musikalische Reis, zo jedem Leed passend,
om Keyboard un met de Quetsch, Gittare un Gesang ungerstütz.

Hä es halt evvens ne Tausendsassa als Live-Musiker un Alleinungerhalder.

Losgetrocke sin mer bovven op däm gääle Wage.
Üvver Täler un Aue, an däm danzend Jungvol vorbei, 
bes mer de rude Sonn em Meer versinke sohe 
un mer bei denne Capri Fischer aagekumme sin.

Mer han inne verzallt dat unsere Papp ne Wandersmann wor 
un mer vun doher schon iwig gään eh „Valeri un Valera“ aanstemme dun.

Mer sungen „de ganze Welt es ne Verein“ un hatten de Häng noh ovvven zom Himmel gereck. Woren zesamme fröhlich un klatschten dozo. Keiner wor allein.

Su kome mer zom Rhing. Do lach dä Mund zo jeder Stund
un e krank Hätz weed schnell gesund.

Als de schön Gesangsreis sich däm Engk nöhere dät, sunge mer: 
„Su ne Dag so wunderschön wie heute, der dürfte nie vergehn.“

Bevür mer noh Huus ginge, 
goov et Brootwosch, Aädäppels-un Nudelschloot, met nem läckere Nohdesch.
E läcker Kölsch oder ne alkfreie Drink hatte mer vürher schon un jetzt ald widder.

Et wor, esu schön wie fröher och, för Alles müngchesmoß gesorg woode.

Mer freue uns jetz schon op dat nächste Widdersinn beim Grillovend.

Met vill Freud niddergeschrivve.

vun Georg Harzheim en däm schöööne Monat Juli 2023